20۔ بچّہ سچا کیوں لگتا ہے

اشکوں
کے چراغ ایڈیشن 2011  صفحہ32

20۔ بچّہ سچا کیوں لگتا ہے

بچّہ سچا کیوں لگتا ہے
اتنا اچھّا کیوں لگتا ہے
سورج ڈوبنے لگتا ہے جب
سایہ لمبا کیوں لگتا ہے
کیوں آواز نہیں سنتا ہے
گنبد بہرا کیوں لگتا ہے
بوڑھا تو بوڑھا ہے لیکن
بچہ بوڑھا کیوں لگتا ہے
تیرا نام لکھوں تو کاغذ
اُجلا اُجلا کیوں لگتا ہے
تن کر چلتا ہے جب انساں
اتنا چھوٹا کیوں لگتا ہے
مر جاتا ہے مرنے والا
پھر بھی زندہ کیوں لگتا ہے
اتنے تاروں کے جھرمٹ میں
چاند اکیلا کیوں لگتا ہے
منزل تو آباد ہے لیکن
رستہ سُونا کیوں لگتا ہے
اتنی مہنگائی کی رُت میں
انساں سستا کیوں لگتا ہے
اپنا تو اپنا ہے مضطرؔ!
غیر بھی اپنا کیوں لگتا ہے
چوہدری محمد علی مضطرؔعارفی

اپنا تبصرہ بھیجیں