334۔ مرے اندر لڑائی ہو رہی ہے

تبصرہ بھیجیں جولائی 13, 2016جولائی 13, 2016 94 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ493۔494

مرے اندر لڑائی ہو رہی ہے

مری مجھ سے جدائی ہو رہی ہے

خدا خوش ہو رہا ہے آسماں پر

خفا ساری خدائی ہو رہی ہے

یہ کس کی آمد آمد ہے قفس میں

جدھر دیکھو صفائی ہو رہی ہے

کسے ڈھونڈا کرو ہو آئنے میں

یہ کس سے آشنائی ہو رہی ہے

اُٹھاؤ بوریا بستر یہاں سے

یہ محفل اب پرائی ہو رہی ہے

مَعَاذَ اللّٰہ ! قانوناً قفس میں

مسلّط پارسائی ہو رہی ہے

فصیلِ شہرِ جاں پر ہر طرف سے

چڑھائی پر چڑھائی ہو رہی ہے

لیا تھا قرض کچھ نادانیوں کا

ادا اب پائی پائی ہو رہی ہے

مَیں کس منہ سے بتاؤں شہرِ دل کی

جو حالت میرے بھائی! ہو رہی ہے

حکومت اور ملّائے حزیں میں

سنا ہے کتخدائی ہو رہی ہے

بہت کچھ ہو رہی ہے بحث و تمحیص

اگرچہ جگ ہنسائی ہو رہی ہے

بقول ان کے بشکلِ قتلِ ناحق

اسیروں کی رِہائی ہو رہی ہے

لہو کا رنگ پھیکا پڑ رہا ہے

مگر صورت حنائی ہو رہی ہے

جہاں مدفون ہیں فتنے پرانے

وہیں پر اب کھدائی ہو رہی ہے

کبھی مضطرؔ سے کھل کر جنگ ہو گی

ابھی تو ہاتھا پائی ہو رہی ہے

چوہدری محمد علی مضطرؔعارفی

http://urdu.goldenpoems.com/