84۔ وحشت اسی سے پھر بھی وہی یار دیکھنا

تبصرہ بھیجیں اکتوبر 26, 2016اکتوبر 26, 2016 200 مناظر 0 پسندیدہ 0 ناپسند

یہ
زندگی ہے ہماری۔ ویراں سرائے کا دیا صفحہ113۔115

وحشت اسی سے پھر بھی وہی یار دیکھنا

پاگل کو جیسے چاند کا دیدار دیکھنا

اس ہجرتی کو کام ہوا ہے کہ رات دن

بس وہ چراغ اور وہ دیوار دیکھنا

پاؤں میں گھومتی ہے زمیں آسماں تلک

اِس طفلِ شیر خوار کی رفتار دیکھنا

یارب کوئی ستارۂ امید پھر طلوع

کیا ہو گئے زمیں کے آثار دیکھنا

لگتا ہے جیسے کوئی ولی ہے ظہور میں

اب شام کو کہیں کوئی مے خوار دیکھنا

اس وحشتی کا حال عجب ہے کہ اُس طرف

جانا بھی اور جانبِ پندار دیکھنا

دیکھا تھا خواب شاعرِ مومن نے اس لیے

تعبیر میں ملا ہمیں تلوار دیکھنا

جو دل کو ہے خبر کہیں ملتی نہیں خبر

ہر صبح اِک عذاب ہے اخبار دیکھنا

میں نے سنا ہے قُربِ قیامت کا ہے نشاں

بے قامتی پہ جُبّہ و دستار دیکھنا

صدیاں گزر رہی ہیں مگر روشنی وہی

یہ سر ہے یا چراغ سرِ دار دیکھنا

اس قافلے نے دیکھ لیا کربلا کا دن

اب رہ گیا ہے شام کا بازار دیکھنا

دو چار کے سوا یہاں لکھتا غزل ہے کون

یہ کون ہیں یہ کس کے طرفدار دیکھنا

1980ء

عبید اللہ علیم ؔ

http://urdu.goldenpoems.com/