237۔ دھوپ میں جو ملنے آیا ہے

تبصرہ بھیجیں اگست 1, 2016اگست 1, 2016 144 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ354

دھوپ میں جو ملنے آیا ہے

میرا اپنا ہی سایہ ہے

چوٹ لگی ہے میرے دل پر

تُو کیوں آنسو بھر لایا ہے

تیرے دکھ کی خاطر ہم نے

دھرتی کا دکھ اپنایا ہے

اپنوں کے بھی ناز سہے ہیں

غیروں کا بھی غم کھایا ہے

یہ جو بانٹ رہا ہوں سب میں

تیری یاد کا سرمایہ ہے

دھوپ کی شدت ہے سولی تک

آگے سایہ ہی سایہ ہے

چھپ کر دل میں کون آیا ہے

کس نے زخم کو سہلایا ہے

اپنے آپ سے لڑنے والے!

تجھ کو کس نے اکسایا ہے

تیرا نام لکھا تھا اس پر

ہم نے جو پتھر کھایا ہے

پہلا پتھر مارنے والے!

کیا تُو میرا ہمسایہ ہے؟

ہمسائے سے کیسے جھگڑوں

ہمسایہ تو ماں جایا ہے

خود بھی تڑپے ہو تم مضطرؔ!

اَوروں کو بھی تڑپایا ہے

چوہدری محمد علی مضطرؔعارفی

http://urdu.goldenpoems.com/