258۔ ناداں اُلجھ رہے تھے عبث آفتاب سے

تبصرہ بھیجیں جولائی 28, 2016جولائی 28, 2016 212 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ381۔382

ناداں اُلجھ رہے تھے عبث آفتاب سے

ہم نے دکھا دیا تھا حوالہ کتاب سے

یہ اور بات ہے کہ ابھی مطمئن نہ تھا

خاموش تو وہ ہو گیا تھا اس جواب سے

آنکھیں کھلی ہوئی تھیں مگر دیکھتی نہ
تھیں

کوئی بڑا عذاب نہ تھا اس عذاب سے

لہروں میں چھپ گئے تھے کنارے کٹے ہوئے

بچ کر نکل گیا تھا سفینہ سراب سے

اللّٰہ بھیج سایۂ ابرِ رواں کوئی

سنولا گئے ہیں دھوپ میں چہرے گلاب سے

کچھ بند پانیوں سے تعلق نہیں رہا

سیراب ہو کے آئے ہیں رودِ چناب سے

کچھ تو جواب دیجیے، شبنم ہی رولیے

پھولوں نے احتجاج کیا ہے جناب سے

کوئی تمیز اچھے برے کی نہیں رہی

دھندلا گئی ہیں سرحدیں اس انقلاب سے

میلی نگاہ سے انھیں دیکھا نہ ہو کہیں

کملا گئے ہیں گُل نِگَہِ انتخاب سے

آئینہ میرے کانپتے ہاتھوں سے گر گیا

مَیں بال بال بچ گیا یوم الحساب سے

مضطرؔ کے نام پر خطِ تنسیخ کھینچ کر

خود کو بھی تم نے کر دیا خارج نصاب
سے

چوہدری محمد علی مضطرؔعارفی

http://urdu.goldenpoems.com/