257۔ تیرے سوا تو کوئی مرا راہبر نہ تھا

تبصرہ بھیجیں جولائی 28, 2016جولائی 28, 2016 220 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ379۔380

تیرے سوا تو کوئی مرا راہبر نہ تھا

یہ اَور بات ہے کہ ترا ہم سفر نہ تھا

سب بے قرار تھے ترے دیدار کے لیے

وہ کون سا حسین تھا جو بام پر نہ تھا

افتاد آ پڑی تھی کچھ ایسی مریض پر

لب پر دعا تھی اور دعا میں اثر نہ تھا

مشکل کے بعد مشکلیں آتی چلی گئیں

یہ امتحاں کا دور بہت مختصر نہ تھا

تُو نے کہا تو آنسوؤں کو بولنا پڑا

ورنہ کوئی صدا نہ تھی جس میں بھنور
نہ تھا

صبحِ ازل تھی لمس کی لذّت پہ خندہ زن

جنت میں دور دور کوئی بھی شجر نہ تھا

اس کو پتا تھا سارے سیاہ و سفید کا

بے نور تو ضرور تھا وہ بے خبر نہ تھا

لیٹے ہوئے تھے ریتلے سائے زمین پر

سوکھے سمندروں سے کسی کو مفر نہ تھا

ہم نے لحد میں چین سے بستر بچھا لیے

مٹی میں کوئی معرکۂ خیر و شر نہ تھا

اس مطلق العنان کا نعرہ بھی تھا غلط

جمہور کا یہ فیصلہ بھی معتبر نہ تھا

تُو بھی تو آ رہا تھا نظر اس کی اوٹ
میں

مضطرؔ کا انحصار فقط چاند پر نہ تھا

چوہدری محمد علی مضطرؔعارفی

http://urdu.goldenpoems.com/