3۔ جاگ اے شرمسار! آدھی رات

تبصرہ بھیجیں جولائی 17, 2016جولائی 17, 2016 195 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ5۔6

جاگ اے شرمسار! آدھی رات

اپنی بگڑی سنوار آدھی رات

یہ گھڑی پھر نہ ہاتھ آئے گی

باخبر ، ہوشیار! آدھی رات

وہ جو بستا ہے ذرّے ذرّے میں

کبھی اس کو پکار آدھی رات

اس کے دربارِ عام میں جا بیٹھ

سب لبادے اتار آدھی رات

دو گھڑی عرضِ مدّعا کر لے

وقت ہے سازگار آدھی رات

بابِ رحمت کو کھٹکھٹانے دے

میرے پروردگار! آدھی رات

شدّتِ غم میں کچھ کمی کر دے

اب تو اے غمگسار! آدھی رات

کھلتے کھلتے کُھلے گا بابِ قبول

عرض کر بار بار آدھی رات

اپنے داتا کے در پہ آیا ہے

ایک اُمّیدوار آدھی رات

ہوش و صبر و قرار کا دامن

ہو گیا تار تار آدھی رات

میری فریاد کا جواب تو دے

بول اے کِردگار! آدھی رات

بے کسوں کو تری کریمی کا

آ گیا اعتبار آدھی رات

اشک در اشک جھلملانے لگا

میرا قرب و جوار آدھی رات

کس لیے بے قرار ہے مضطرؔ

کس کا ہے انتظار آدھی رات

٭…آدھی کو پنجابی لفظ ادّھی کے معنوں میں سمجھا جائے۔

چوہدری محمد علی مضطرؔعارفی

http://urdu.goldenpoems.com/