111۔ خورشید بکف کوئی کہاں ہے

تبصرہ بھیجیں اکتوبر 16, 2016اکتوبر 16, 2016 156 مناظر 0 پسندیدہ 0 ناپسند

یہ
زندگی ہے ہماری۔ چاند چہرہ ستارہ آنکھیں
صفحہ21۔22

خورشید بکف کوئی کہاں ہے

سب اپنی ہی روشنیٔ جاں ہے

میں بھی تو ادھر ہی جا رہا ہوں

مجھ کو بھی تلاش ِ رفتگاں ہے

پھر دیکھنا خوابِ عہد رفتہ

مل لو ابھی وقت مہرباں ہے

سودا بھی کروں تو کیا کہ دنیا

باہر سے سجی ہوئی دُکاں ہے

شعلے کوخبر ہی کیا نمو میں

اپنے ہی وجود کا زیاں ہے

ہر لحظہ بدل رہی ہے دنیا

ہر پَل کوئی خوابِ رائیگاں ہے

لیتا ہی نہیں کہیں پڑاؤ

یادوں کا عجیب کارواں ہے

مانا کہ جدا نہیں ہیں ہم تم

پھر بھی کوئی فصل درمیاں ہے

اے ابرِ بہارِ نو برس بھی

پھر تازہ ہجوم تشنگاں ہے

اے موجِ فنا گزر بھی سر سے

ہونے کا مجھے بہت گماں ہے

1965ء

عبید اللہ علیم ؔ

http://urdu.goldenpoems.com/