28۔ فرقت کو وصال کر دیا ہے

تبصرہ بھیجیں ستمبر 12, 2016ستمبر 12, 2016 154 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ42

فرقت کو وصال کر دیا ہے

تو نے تو نہال کر دیا ہے

آنسو ہی نہیں مریضِ دل کو

ہر زہر اُبال کر دیا ہے

یہ دین ہے تیری دینے والے!

جو غم بھی ہے پال کر دیا ہے

اتنا تو کیا ہے تو نے قاتل!

اظہارِ مَلال کر دیا ہے

دشنام بھی دی ہے مسکرا کر

پتھّر بھی اُچھال کر دیا ہے

اس کو مرے راستے میں رکھ دو

کانٹا جو نکال کر دیا ہے

فرہاد کا رک گیا ہے تیشہ

پتھّر نے سوال کر دیا ہے

ہم نے سرِ دار مسکرا کر

مشکل کو محال کر دیا ہے

چپکے سے چلا گیا بچھڑ کر

مضطرؔؔ نے کمال کر دیا ہے

چوہدری محمد علی مضطرؔعارفی

http://urdu.goldenpoems.com/