317۔ زخم بولے تو جیسے بھر سے گئے

تبصرہ بھیجیں جولائی 16, 2016جولائی 16, 2016 119 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ469

زخم بولے تو جیسے بھر سے گئے

مسکرائے تو بن سنور سے گئے

گھر کے اندر بھی دشت تھے آباد

گھر میں آئے تو پھر نہ گھر سے گئے

ان کو سچ بولنے کی عادت تھی

آئنے آئنوں سے ڈر سے گئے

آہٹوں کے اسیر سنّاٹے

کبھی ٹھہرے، کبھی گزر سے گئے

آنسوؤں نے بھی ساتھ چھوڑ دیا

یہ مسافر بھی اب سفر سے گئے

یاد کی محفلیں بھی خواب ہوئیں

خواب کے رنگ بھی بکھر سے گئے

دوست بھی جا چکے رِہا ہو کر

اور دشمن بھی جیسے مر سے گئے

اشک برسے تو چاہتوں کے چناب

لذّتِ تشنگی سے بھر سے گئے

ہم بھی کیا آئے محفلِ جاں میں

بے خبر آئے بے خبر سے گئے

تاب کب لا سکے اذیّت کی

آئینے ٹوٹ کر بکھر سے گئے

کُوئے الزام! تیری عمر دراز

تجھ سے نکلے تو شہر بھر سے گئے

رات جب بھیگنے لگی مضطرؔ!

چاند چہرے بھی کچھ نکھر سے گئے

٨جولائی،١٩٩٥ء

چوہدری محمد علی مضطرؔعارفی

http://urdu.goldenpoems.com/