135۔ کسی کے روکنے سے کم رکے گا

تبصرہ بھیجیں اگست 22, 2016اگست 22, 2016 124 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ211۔212

کسی کے روکنے سے کم رکے گا

یہ طوفاں خودبخود یک دم رکے گا

طلوعِ صبح تک ہے شورِ محشر

گھڑی بھر میں یہ زیر و بم رکے گا

ہوس کی آگ ہے جلتی رہے گی

دھواں اُٹھتا رہے گا، دم رکے گا

تم آ جاؤ تو کچھ تسکین ہو گی

یہ دردِ دل ذرا باہم رکے گا

ہماری یاد تڑپایا کرے گی

زمانہ روئے گا جب دم رُکے گا

بتا اے کاروبارِ غم کے خالق!

کبھی یہ کاروبارِ غم رکے گا؟

کہیں گل بھی نہ ہنسنا بند کر دیں

سنا ہے گریۂ شبنم رکے گا

یہ چلتا چوک ہے چہرے چھپا لو

یہاں ہر ایک نامحرم رکے گا

یہ شہرِ غم ہے، وہ شہرِ طلب ہے

کہیں تو چاند کا پرچم رکے گا

عدم کی سرزمیں بھی آن پہنچی

پرائے دیس کا ماتم رکے گا

یہی رودِ چنابِ آرزو ہے

یہیں تو چاند کا پرچم رکے گا

زمانہ آئے گا ملنے کو مضطرؔ!

سرِ مرقد بچشمِ نم رکے گا

چوہدری محمد علی مضطرؔعارفی

http://urdu.goldenpoems.com/