109۔ ارمغاں ہے یہ پیرِ کامل کا

تبصرہ بھیجیں اگست 27, 2016اگست 27, 2016 213 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ176

ارمغاں ہے یہ پیرِ کامل کا

داغ ہے یا چراغ ہے دل کا

وار اوچھا پڑا ہے قاتل کا

دیدنی ہو گا رقص بسمل کا

گر گئی اس کے ہاتھ سے تلوار

جاگ اُٹھّا ضمیر قاتل کا

آپ طوفاں سے ڈر رہے ہوں گے

مجھ کو کھٹکا لگا ہے ساحل کا

جس قدر تھا قصور آنکھ کا تھا

نام بدنام ہو گیا دل کا

اب کے گزرا کچھ اس طرح طوفاں

مٹ گیا ہے نشان ساحل کا

منزلوں سے گزر رہے ہیں لوگ

پوچھتے ہیں نشان منزل کا

تیرے چہرے کی چاندنی کی قسم

راستہ جگمگا اٹھا دل کا

عقل کیا، عقل کی حقیقت کیا

جمگھٹا سا ہے اک دلائل کا

راستے پاس آ گئے مضطرؔ!

رات قصّہ چھڑا تھا منزل کا

چوہدری محمد علی مضطرؔعارفی

http://urdu.goldenpoems.com/