17۔ اتنی مجبوریوں کے موسم میں

تبصرہ بھیجیں ستمبر 14, 2016ستمبر 14, 2016 201 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ28

اتنی مجبوریوں کے موسم میں

جشن برپا ہے دیدۂ نم میں

منسلک بھی ہیں رشتۂ غم میں

فاصلے بھی ہیں کس قدر ہم میں

آسمان اور زمین کا ہے فرق

درد میں اور دردِ پیہم میں

ہجر کی شب ہی وصل کی شب ہے

یعنی رمضان ہے محرَّم میں

ایک ترتیب ہے پسِ پردہ

پیچ در پیچ زلفِ برہم میں

رنگ و بو اور دل کشی کے سوا

پھول کا خون بھی ہے شبنم میں

دمِ عیسیٰ ہے معجزہ کس کا

کس کی پاکیزگی ہے مریم میں

بھول جاؤں مَیں راستہ اے کاش!

زلف ِجاناں کے پیچ اور خم میں

زخم بھرنے لگے ہیں، یاروں نے

کچھ ملا نہ دیا ہو مرہم میں

ہو گیا کون زندۂ جاوید

خون کس کا ہے ساغرِ جم میں

جس سے پوچھو وہی فرشتہ ہے

کیا کوئی آدمی نہیں ہم میں!

میرے مالک! کوئی بشارت دے

دل کی تبدیلیوں کے موسم میں

یہ رہِ مستقیم ہے مضطرؔ!

دائرہ ہے جو زلف کے خم میں

چوہدری محمد علی مضطرؔعارفی

http://urdu.goldenpoems.com/