342۔ اشک برسے تو اس قدر برسے

تبصرہ بھیجیں جولائی 11, 2016جولائی 11, 2016 191 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ507

اشک برسے تو اس قدر برسے

دُھل گئی ہے زمین اندر سے

پُر سکوں ہیں اگرچہ باہر سے

ڈَھے رہے ہیں مکان اندر سے

ہو کے ناراض دیدۂ تر سے

اشک اکیلا نکل گیا گھر سے

کوئی خطرہ نہیں سمندر سے

ڈر اگر ہے تو دیدۂ تر سے

خشک سالی سی خشک سالی ہے

آنکھ اور بوند بوند کو ترسے!

کوئی اپنا رہا نہ بے گانہ

رات پانی گزر گیا سر سے

کیا تجھے راستہ دکھائیں گے

راہ میں جو پڑے ہیں پتھر سے

کچھ تو خوفِ خدا کرو لوگو!

اس قدر جھوٹ اور منبر سے!

ہے خبر گرم رات مولانا

قرض لینے گئے تھے کافر سے

اپنے سائے سے ڈرتا پھرتا ہے

محتسب احتساب کے ڈر سے

آپ کا اس نے کیا بگاڑا ہے

کیوں خفا ہو رہے ہو مضطرؔ سے

١٩٨٩

چوہدری محمد علی مضطرؔعارفی

http://urdu.goldenpoems.com/