338۔ چھیڑ کر ہم نے سلسلہ دل کا

تبصرہ بھیجیں جولائی 12, 2016جولائی 12, 2016 196 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ500

چھیڑ کر ہم نے سلسلہ دل کا

کر لیا خود ہی حادثہ دل کا

دل کے چاروں طرف ہیں دیواریں

کوئی رستہ نہیں رہا دل کا

اپنا چہرہ بھی ساتھ لے جانا

منتظر ہو گا آئنہ دل کا

دیکھیے! جیت کس کی ہوتی ہے

دل سے ہو گا مقابلہ دل کا

دل کی مجبوریاں، معاذ اللّٰہ!

اب نہ کرنا کبھی گلہ دل کا

اس کا نعم البدل نہیں کوئی

ہے تو دل ہے فقط صلہ دل کا

عقل منزل کے دھیان میں گم تھی

لُٹ گیا رہ میں قافلہ دل کا

پی لیا مسکرا کے اشکوں کو

دیکھ کر ہم نے حوصلہ دل کا

کچھ تو ہے درمیان میں حائل

کچھ تو ہے دل سے فاصلہ دل کا

درِ دل تک تو دل کا ساتھ رہا

پھر نہ کوئی پتا چلا دل کا

عقل کیا اس میں مشورہ دے گی

دل پہ چھوڑو معاملہ دل کا

خیریت سے گزر گیا مضطرؔ!

سخت نازک تھا مرحلہ دل کا

مئی،١٩٩٥ء

چوہدری محمد علی مضطرؔعارفی

http://urdu.goldenpoems.com/