23۔ گھر کے کواڑ زیرِ زباں بولنے لگے

تبصرہ بھیجیں ستمبر 13, 2016ستمبر 13, 2016 267 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ35۔36

گھر کے کواڑ زیرِ زباں بولنے لگے

مالک چلے گئے تو مکاں بولنے لگے

دشمن اگر ہماری زباں بولنے لگے

بجھ جائے آگ اور دھؤاں بولنے لگے

سورج چلا گیا تو اُتر آئی چاندنی

پلکوں پہ روشنی کے نشاں بولنے لگے

وہ سنگدل بھی کوئے ندامت میں جا بسا

پتھر بھی پانیوں کی زَباں بولنے لگے

پہلے خلائے جاں میں خموشی رہی مگر

پھر یوں ہؤا کہ کون و مکاں بولنے لگے

نمرود نے جلائی تھی جو آگ، بجھ گئی

آزردگانِ آذرِ جاں بولنے لگے

پانی اُتر گیا تو نظر آئے فاصلے

ساحل سمندروں کی زباں بولنے لگے

دشتِ جنوں میں عقل کا سیلاب آ گیا

اندیشہ ہائے سود و زیاں بولنے لگے

بیتے ہوئے دنوں سے نہ سرگوشیاں کرو

ایسا نہ ہو کہ عمرِ رواں بولنے لگے

کس کی مجال تھی کہ سرِ دار بولتا

بولے ہیں ہم تو تم بھی میاں! بولنے
لگے

مضطرؔ! ضمیرِ لفظ کے سُونے مکان میں

وہ حبس تھا کہ وہم و گماں بولنے لگے

چوہدری محمد علی مضطرؔعارفی

http://urdu.goldenpoems.com/