22۔ زمیں کا زخم بھی اب بھر رہا ہے

تبصرہ بھیجیں ستمبر 13, 2016ستمبر 13, 2016 186 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ34

زمیں کا زخم بھی اب بھر رہا ہے

نہ دلّی ہے، نہ امرتسر رہا ہے

رہا ہے تو ہمارے قتل کے بعد

ہمارا ذکر ہی اکثر رہا ہے

یہ کمرہ جس سے خوشبو آ رہی ہے

ہمارے یار کا دفتر رہا ہے

صداقت سامنے عریاں کھڑی ہے

وہ آئینے سے جھگڑا کر رہا ہے

پگھلنے کی اسے فرصت نہیں ہے

یہ پتھر عمر بھر پتھر رہا ہے

اسے چالاکیاں آتی نہیں ہیں

وہ اکثر شہر سے باہر رہا ہے

وہؐ پیاسوں کی اذیّت کا ہے محرم

وہ صحراؤں سے ہم بستر رہا ہے

اسے معلوم ہے ردّی کا بھاؤ

وہ اخباروں کا سوداگر رہا ہے

کسی کو اب شکایت ہے نہ شکوہ

ہم اپنے گھر، وہ اپنے گھر رہا ہے

یہ آنسو جس کو آنسو کہہ رہے ہو

یہی تو آنکھ کا زیور رہا ہے

محبت ہو گئی ہے تجھ سے مضطرؔ!

تو کس محبوب کا نوکر رہا ہے

چوہدری محمد علی مضطرؔعارفی

http://urdu.goldenpoems.com/