48۔ شرم سی کچھ، حجاب سا کچھ ہے

تبصرہ بھیجیں ستمبر 8, 2016ستمبر 8, 2016 314 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ75۔76

شرم سی کچھ، حجاب سا کچھ ہے

قرب بھی بے حساب سا کچھ ہے

ماہ سا، ماہتاب سا کچھ ہے

ہو بہو آنجناب سا کچھ ہے

مسکراتا ہؤا، حسین و جمیل

ایک چہرہ گلاب سا کچھ ہے

اس کو دیکھا تو یوں لگا جیسے

عشق کارِ ثواب سا کچھ ہے

اس میں آنکھوں کا کچھ قصور نہیں

حسن خود بے نقاب سا کچھ ہے

اس نے دیکھا نہ ہو رُخِ انور

آئنہ آفتاب سا کچھ ہے

ہم اکیلے نہیں ہیں گرمِ سفر

آسماں ہمرکاب سا کچھ ہے

کون شائستۂ صلیب ہے آج

عرش پر انتخاب سا کچھ ہے

آج پھر آسمان بولا ہے

عشق پھر کامیاب سا کچھ ہے

ہم فقیروں کا، ہم اسیروں کا

یہ جواب الجواب سا کچھ ہے

لفظ لفظ آسماں سے اُترا ہے

یہ جو حسنِ خطاب سا کچھ ہے

ہو رہا ہے حریف شرمندہ

معترض لاجواب سا کچھ ہے

دشمنِ جاں سے زیرِ لب ہی سہی

اک سوال و جواب سا کچھ ہے

آسماں سے برس رہی ہے آگ

ایک ’’عالم کباب‘‘ سا کچھ ہے

تم نے کابل میں جو کیا تھا ستم

اس ستم کا حساب سا کچھ ہے

تم نے کی تھی جو التجا مضطرؔ!

اس کا یہ استجاب سا کچھ ہے

چوہدری محمد علی مضطرؔعارفی

http://urdu.goldenpoems.com/