56۔ وہ زمانہ بھی کیا زمانہ تھا

تبصرہ بھیجیں ستمبر 6, 2016ستمبر 6, 2016 251 مناظر 0 پسندیدہ 0 ناپسند

اشکوں کے چراغ ایڈیشن 2011 صفحہ91

وہ زمانہ بھی کیا زمانہ تھا

عشق تھا اور غائبانہ تھا

جس حسیں سے تمھیں محبت تھی

اس سے اپنا بھی عاشقانہ تھا

وہ کہیں دل کے پار رہتا تھا

وہ فقط دل کا واہمہ نہ تھا

اس کی ہر ایک سے لڑائی تھی

اس کا ہر اک سے دوستانہ تھا

اس کے آنے پہ کس لیے ہو خفا

اس نے آخر کبھی تو آنا تھا

اس میں انوار تھے خدائی کے

ہم نے مانا کہ وہ خدا نہ تھا

وہ اسی کا تھا خاص بھیجا ہؤا

اس کا آنا خدا کا آنا تھا

وہ شجر تھا گھنا محبت کا

اس کے سائے میں بیٹھ جانا تھا

بھول کر بھی نہ اس کو بھول سکے

یہ تعلق بہت پرانا تھا

معتکف تھے قفس میں ہم مضطرؔ!

کہیں آنا کہیں نہ جانا تھا

چوہدری محمد علی مضطرؔعارفی

http://urdu.goldenpoems.com/