80۔ تم عہد کے حالات رقم کیوں نہیں کرتے

تبصرہ بھیجیں ستمبر 2, 2016ستمبر 2, 2016 206 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ138

تم عہد کے حالات رقم کیوں نہیں کرتے

تصویر کے ٹکڑوں کو بہم کیوں نہیں کرتے

چہروں کے کھنڈر بھی ہیں بہت دید کے قابل

سیر ان کی بھی دو چار قدم کیوں نہیں کرتے

تم کس لیے معیار کی سولی پہ چڑھے ہو

دانا ہو تو معیار کو کم کیوں نہیں کرتے

کیوں چھوڑ نہیں دیتے ہمیں حال پہ اپنے

اے اہلِ کرم! اتنا کرم کیوں نہیں کرتے

کیوں اتنے خداؤں کی پر ستش میں لگے
ہو

سر ایک کی دہلیز پہ خم کیوں نہیں کرتے

صحرائے تحیّر میں کھڑے سوچ رہے ہو

رَم خوردہ ہو تم لوگ تو رم کیوں نہیں کرتے

میں بھی تو حسینؓ ابنِ علیؓ کا ہوں
ثنا خواں

سر میرا سرِ عام قلم کیوں نہیں کرتے

دم توڑ نہ دے آپ کا بیمارِ محبت

عیسیٰ ہو تو بیمار پہ دم کیوں نہیں کرتے

حیراں ہیں صنم خانے بھی اس بات پہ مضطرؔ!

جو کہتے ہیں وہ بات صنم کیوں نہیں کرتے

چوہدری محمد علی مضطرؔعارفی

http://urdu.goldenpoems.com/