93۔ اگر آتا نہ ہو انکار پڑھنا

تبصرہ بھیجیں اگست 30, 2016اگست 30, 2016 198 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ158

اگر آتا نہ ہو انکار پڑھنا

کبھی اس عہد کے اخبار پڑھنا

تم اپنا جھوٹ خود پڑھ کر سنا دو

ہمیں آتا نہیں سرکار پڑھنا

وفا کے جرم میں اہلِ وفا کو

کبھی باغی، کبھی غدّار پڑھنا

خدائی کا اگر دعویٰ کیا ہے

دلوں کو بھی بتِ عیّار! پڑھنا

یہی تو ہے جھلک صبحِ ازل کی

کسی چہرے کو پہلی بار پڑھنا

میں مل کر آ رہا ہوں اک حسیں سے

مجھے اے آئنہ بردار! پڑھنا

مرا غم بن گیا ہے شہر کا غم

مرے غم کو مرے غمخوار! پڑھنا

مری فردِ عمل سب سے چھپا کر

مرے سیّد، مرے ستّار! پڑھنا

تمھی چاروں طرف لکھے ہوئے ہو

مرے دل کے در و دیوار پڑھنا

بدل جائے گا مضطر!ؔ میرا مفہوم

کبھی مجھ کو نہ اتنی بار پڑھنا

چوہدری محمد علی مضطرؔعارفی

http://urdu.goldenpoems.com/