244۔ محبت کے اظہار تک آ گیا ہوں

تبصرہ بھیجیں جولائی 31, 2016جولائی 31, 2016 216 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ363

محبت کے اظہار تک آ گیا ہوں

خموشی سے تکرار تک آ گیا ہوں

وہ سورج ہے نکلا ہے مغرب میں جا کر

مَیں سایہ ہوں دیوار تک آ گیا ہوں

مہک ہوں تو مَیں پھیلتا جا رہا ہوں

اگر پھول ہوں خار تک آ گیا ہوں

یہ اعجاز ہے ہجر کا اے شبِ غم!

کہ فرقت سے دیدار تک آ گیا ہے

نہیں اتنی جرأت کہ در کھٹکھٹاؤں

اگرچہ درِ یار تک آ گیا ہوں

ملاقات کی کوئی صورت تو ہو گی

یہی سوچ کر دار تک آ گیا ہوں

اگر چپ رہا ہوں تو چرچے ہوئے ہیں

ہنسا ہوں تو اخبار تک آ گیا ہوں

بگولوں کا ڈر ہے نہ آندھی کا خطرہ

مَیں اب دشت کے پار تک آ گیا ہوں

ملے نہ ملے، اس کی مرضی ہے مضطرؔ!

مَیں داتا کے دربار تک آ گیا ہوں

اگست، ١٩٨٨ء

چوہدری محمد علی مضطرؔعارفی

http://urdu.goldenpoems.com/