1۔ اپنے کرم سے بخش دے میرے خدا مجھے

تبصرہ بھیجیں مارچ 23, 2016مارچ 23, 2016 423 مناظر 0 پسندیدہ 0 ناپسند

کلام
محمود صفحہ1

اپنے کرم سے بخش دے میرے خدا مجھے

بیمارِ عشق ہوں ترا دے تو شفا مجھے

جب تک کہ دم میں دم ہے اسی دین پر رہوں

اسلام پر ہی آئے جب آئے قضا مجھے

بے کس نواز ذات ہے تیری ہی اے خدا

آتا نظر نہیں کوئی تیرے سوا مجھے

منجملہ تیرے فضل و کرم کے ہے یہ بھی
ایک

عیسیٰ ؑمسیح سا ہے دیا رہنما مجھے

تیری رضا کا ہوں میں طلب گار ہر گھڑی

گر یہ ملے تو جانوں کہ سب کچھ ملا مجھے

ہاں ہاں نگاہِ رحم ذرا اس طرف بھی ہو

بحر گنہ میں ڈوب رہاہوں بچا مجھے

موسیٰ ؑکے ساتھ تیری رہیں لن ترانیاں

زنہار میں نہ مانوں گا چہرہ دکھا مجھے

احساں نہ تیرا بھولوں گا تازیست اے
مسیح ؑ

پہنچا دے گر تو یار کے در پر ذرا مجھے

سجدہ کناں ہوں در پہ ترے اے مرے خدا

اٹھوں گا جب اٹھائے گی یاں سے قضا مجھے

ڈوبا ہوں بحرِ عشقِ الٰہی میں شاد میں

کیا دے گا خاک فائدہ آبِ بقا مجھے

یہ نظم 1903ء کی ہے جب آپ شاد تخلص رکھتے تھے۔

رسالہ تشحیذ الاذہان ماہ اگست 1916ء

http://urdu.goldenpoems.com/