160۔ آہٹوں سے ہے سارا گھر آباد

تبصرہ بھیجیں اگست 17, 2016اگست 17, 2016 121 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ243۔244

آہٹوں سے ہے سارا گھر آباد

اس خرابے کے ہیں کھنڈر آباد

ایک پل بھی ہمیں سکوں نہ ملا

لوگ رہتے ہیں عمر بھر آباد

کون محوِ خرام ہے دل میں

یہ خرابہ ہے کس قدر آباد

گھورتی ہیں ہزارہا آنکھیں

کہیں چہرے، کہیں بھنور آباد

منتظر ہیں روش روش یادیں

ٹہنی ٹہنی، شجر شجر آباد

شدّتِ غم سے داغ داغ ہے دل

ایک گھر میں ہیں لاکھ گھر آباد

کوئی اپنا رہے نہ بے گانہ

دل میں ہو جاؤ تم اگر آباد

حدِّ فاصل کو پار کون کرے

ہم ادھر اور تم ادھر آباد

سارا ہنگامہ تیرے فیض سے ہے

تُو رہے شاد ، نامہ بر! آباد

کون مضطرؔ ادھر سے گزرا ہے

ہو گئی ساری رہ گزر آباد

چوہدری محمد علی مضطرؔعارفی

http://urdu.goldenpoems.com/