118۔ آنسو اُبل کے دیدۂ مضطرؔ میں آ گئے

تبصرہ بھیجیں اگست 25, 2016اگست 25, 2016 115 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ185۔186

آنسو اُبل کے دیدۂ مضطرؔ میں آ گئے

دستک دیے بغیر بھرے گھر میں آ گئے

لذّت ہمیں نصیب ہوئی انتظار کی

انعام سب ہمارے مقدّر میں آ گئے

آنسو گرا تو سوچ کا سینہ لرز گیا

طوفان آہٹوں کے سمندر میں آ گئے

ہنگامِ ذبح عمرِ گزشتہ کے واقعات

ایک ایک کر کے ذہنِ کبوتر میں آ گئے

خوابِ سحر سے جاگ بھی نادان! آنکھ کھول

سورج پگھل کے جامِ گلِ تر میں آ گئے

پردہ اُٹھا تو عقل کا چہرہ اُتر گیا

لاکھوں شگاف ذہن کی چادر میں آ گئے

"اصلِ شہود و شاہد و مشہود ایک
ہے”

تم کیوں مشاہدات کے چکّر میں آ گئے

کچھ لوگ رہنِ چشمۂ آبِ بقا ہوئے

اَور کچھ فریبِ بادہ و ساغر میں آ گئے

”ہر روز روزِ عید ہے، ہر شب
شبِ برات”

محفل سے اُٹھّے کوچۂ دلبر میں آ گئے

ذرّات کی برہنگی کی تاب تھی کسے

ذرّے جلے تو چاند بھی چکّر میں آ گئے

چہرہ دکھا دے شاہدِ معنٰی! قریب آ

الفاظ دامِ زلفِ معنبر میں آ گئے

اب بوالہوس غریب کرے بھی توکیا کرے

جو حادثے تھے دامنِ مضطرؔ میں آ گئے

چوہدری محمد علی مضطرؔعارفی

http://urdu.goldenpoems.com/