329۔ پسِ لمحہ جو لمحہ سو رہا ہے

تبصرہ بھیجیں جولائی 14, 2016جولائی 14, 2016 120 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ485۔486

پسِ لمحہ جو لمحہ سو رہا ہے

یہ سب کچھ اس کی خاطر ہو رہا ہے

جسے تم کہہ رہے ہو عہدِ رفتہ

وہ رفتہ رفتہ زندہ ہو رہا ہے

اسی کا نام ہے شاید محبت

یونہی جو سانحہ سا ہو رہا ہے

گئی ہے ماں کہیں محفل سجانے

مگر بچہ اکیلا سو رہا ہے

نظر آنے لگے ہیں چاند چہرے

قفس میں کوئی تارے بو رہا ہے

جو کھویا تھا اسے پانے کی خاطر

جو پایا تھا اسے بھی کھو رہا ہے

لہو کے داغ ہیں جو آستیں پر

انھیں اپنے لہو میں دھو رہا ہے

اگرچہ منہ سے کچھ کہتا نہیں ہے

اسے معلوم ہے جو ہو رہا ہے

کہیں ایسا نہ ہو بن جائے پتھر

کہ ہنستا ہے نہ پاگل رو رہا ہے

سَوا نیزے پہ آ پہنچا ہے سورج

دلِ نادان پھر بھی سو رہا ہے

چوہدری محمد علی مضطرؔعارفی

http://urdu.goldenpoems.com/