287۔ آئی ہے اس کی یاد یوں سُونے گھروں کے بیچ

تبصرہ بھیجیں جولائی 22, 2016جولائی 22, 2016 145 مناظر 0 پسندیدہ 0 ناپسند

اشکوں کے چراغ ایڈیشن 2011 صفحہ427۔428

آئی ہے اس کی یاد یوں سُونے گھروں کے بیچ

جیسے کوئی گلاب کھلے پتھروں کے بیچ

محصور خیمہ زن ہیں سرِ دشتِ کربلا

بیٹھے ہوئے ہیں ہم بھی اِنھی بے گھروں کے بیچ

لایا ہوں اوجِ دار سے اس کو اتار کر

لپٹا ہؤا ہے سر جو نئی چادروں کے بیچ

دیکھا قریب سے تو نظارہ بدل گیا

اور اختلاف بڑھ گیا دیدہ وروں کے بیچ

آباد ہو رہے ہیں پرانے صنم کدے

بت مسکرا رہے ہیں نئے آذروں کے بیچ

نکلے ہیں لوگ عمرِ گزشتہ کو ڈھونڈنے

انسان کھو گیا ہے کہیں مقبروں کے بیچ

سب ڈَھے گئی ہے شہر پنہ شہرِ ذات کی

اب دائرے ہی دائرے ہیں دائروں کے بیچ

پینا پڑے تو پیجیے گا احتیاط سے

زہرِ غمِ حیات ہے ان ساغروں کے بیچ

کرنے چلا ہے فیصلہ سانپ اقتدار کا

موسٰیؑ کے اور مصر کے جادوگروں کے بیچ

مضطرؔ! شبِ فراق کا مرغِ سحر شناس

تارے چھپا کے لے گیا اُجلے پروں کے بیچ

چوہدری محمد علی مضطرؔعارفی

http://urdu.goldenpoems.com/