23۔ ان دنوں روح کا عالم ہے عجب

تبصرہ بھیجیں نومبر 24, 2016نومبر 24, 2016 216 مناظر 0 پسندیدہ 0 ناپسند

یہ
زندگی ہے ہماری۔ نگارِصبح کی اُمید میں صفحہ57۔59

ان دنوں روح کا عالم ہے عجب

جیسے جو حسن ہےمیرا ہے وہ سب

جیسے اک خواب میں نکلا ہوا دن

جیسے اک وصل میں جاگی ہوئی شب

دل پہ کھلتا ہے اسی موسم میں

غم کسے کہتے ہیں اور کیا ہے طرب

جس سے ہو جائے جہاں ہو جائے

ہے محبت ہی محبت کا سبب

جاں فزا ہے جو عطا کرتے رہو

بوسۂ لب کی طرح بوسۂ لب

پہلے اک ناز بھرا ربط و گریز

اس نے پھر بخش دیا سب کا سب

تم سا کیا ہو گایہاں خواب کوئی

مجھ سا کیا ہو گاکوئی خواب طلب

کاش تعبیر میں تم ہی نکلو

جب کوئی خواب ہو تعبیر طلب

اس کے عشاق جہاں بھی دیکھو

ایک ہی نشے میں ڈوبے ہوئے سب

سلسلے اس سے مل جائیں تو ٹھیک

ورنہ جھوٹے ہیں یہ سب نام و نسب

لوگ موجود ہیں اب بھی جن کے

منہ سے جو بات نکل جائےادب

سایۂ زلف میں مر جاؤں علیمؔ

کھینچ لے گر نہ مجھے سایۂ رب

1991ء

عبید اللہ علیم ؔ

http://urdu.goldenpoems.com/