37۔ ویران سرائے کا دیا ہے

تبصرہ بھیجیں نومبر 15, 2016نومبر 15, 2016 224 مناظر 0 پسندیدہ 0 ناپسند

یہ
زندگی ہے ہماری۔ ویراں سرائے کا دیا صفحہ55

ویران سرائے کا دیا ہے

جو کون و مکاں میں جل رہا ہے

یہ کیسی بچھڑنے کی سزا ہے

آئینے میں چہرہ رکھ گیا ہے

خورشید مثال شخص کل شام

مٹی کے سپرد کر دیا ہے

تم مر گئے حوصلہ تمھارا

زندہ ہوں یہ میرا حوصلہ ہے

اندر بھی زمیں کے روشنی ہو

مٹی میں چراغ رکھ دیا ہے

میں کون سا خواب دیکھتا ہوں

یہ کون سے ملک کی فضا ہے

وہ کون سا ہاتھ ہے کہ جس نے

مجھ آگ کو خاک سے لکھا ہے

رکّھا تھا خلا ء میں پاؤں میں نے

رستے میں ستارہ آگیا ہے

شاید کہ خدا میں اور مجھ میں

اِک جست کا اور فاصلہ ہے

گردش میں ہیں کتنی کائناتیں

بچہ مرا پاؤں چل رہا ہے

1978ء

عبید اللہ علیم ؔ

http://urdu.goldenpoems.com/