25۔ اپنے اندر کی بھی سیاحت کر

تبصرہ بھیجیں ستمبر 13, 2016ستمبر 13, 2016 143 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ38

اپنے اندر کی بھی سیاحت کر

کبھی اپنی طرف بھی ہجرت کر

اپنے اندر کے آدمی سے مِل

اس ملاقات کی بھی صورت کر

بوریت کچھ تو دُور ہو جائے

میرے دشمن! کوئی شرارت کر

دل میں محسوس کر اسے، لیکن

دیکھنے کی کبھی نہ جرأت کر

منطقُ الطَّیر بخشنے والے!

پرِ پرواز بھی عنایت کر

بول اے معترض! خموش ہے کیوں

کوئی خود ساختہ روایت کر

ہر کسی کو نظر نہ آیا کرے

اپنی تصویر کو نصیحت کر

موت کے بعد بھی نہ بھول ہمیں

قبر میں بھی نہ استراحت کر

اپنی صورت سے باخبر بھی رہ

آئنہ دیکھنے کی عادت کر

تیرا مسلک اگر محبت ہے

اپنے دشمن سے بھی محبت کر

عشق میں مصلحت نہیں ہوتی

عشق کر اور بے ضرورت کر

جا رہا ہوں سفیرِ دل بن کر

مجھ کو عزّت کے ساتھ رخصت کر

اشک در اشک روح کوبھی کھنگال

اُٹھ کے راتوں کو غسلِ صحّت کر

بخش دے تو مجھے بغیرِ حساب

مَیں نہیں کہہ رہا رعایت کر

عقل کے ہاتھوں تنگ ہے مضطرؔ

دلِ ناداں! کوئی حماقت کر

چوہدری محمد علی مضطرؔعارفی

http://urdu.goldenpoems.com/