122۔ عقل کا اندھا ہے دیوانہ نہیں

تبصرہ بھیجیں اگست 24, 2016اگست 24, 2016 122 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ191۔192

عقل کا اندھا ہے دیوانہ نہیں

تم نے دیوانے کو پہچانا نہیں

عاشقِ صادق ہوں فرزانہ نہیں

میرے اندر عقل کا خانہ نہیں

مَیں گیا موسم نہیں ہوں، وقت ہوں

مجھ کو واپس لوٹ کر آنا نہیں

نیک ہونے کا ہے نیّت پر مدار

نیکیوں کا کوئی پیمانہ نہیں

چین آ سکتا نہیں اس دور میں

اور آ جائے تو گھبرانا نہیں

کوئی منزل ہے نہ کوئی راستہ

اب کہیں آنا نہیں جانا نہیں

پیش و پس کا کیا تجھے ادراک ہو

تُو کسی تسبیح کا دانہ نہیں

زندہ رہنے کی سزا ہے زندگی

کوئی مرنے کا بھی جرمانہ نہیں

دل پہ دستک دے رہے ہو کس لیے

گھر میں کوئی صاحبِ خانہ نہیں

جاؤ لے آؤ شرافت کی َسند

کیا تمھارے شہر میں تھانہ نہیں

تُو ہے مضطرؔ! ایک ہی در کا غلام

تیری قسمت ٹھوکریں کھانا نہیں

چوہدری محمد علی مضطرؔعارفی

http://urdu.goldenpoems.com/