231۔ نہیں وہ شخص تو ایسا نہیں ہے

تبصرہ بھیجیں اگست 2, 2016اگست 2, 2016 192 مناظر 0 پسندیدہ 0 ناپسند

اشکوں
کے چراغ ایڈیشن 2011 صفحہ343۔344

نہیں وہ شخص تو ایسا نہیں ہے

اسے تم سے کوئی شکوہ نہیں ہے

نہیں یوں بھی کہ وہ ملتا نہیں ہے

مگر مجبور بھی اتنا نہیں ہے

رکیں تو آپ رک جاتے ہیں دریا

مگر ایسا کبھی ہوتا نہیں ہے

وہ سَچّا بھی ہے، سُچّا بھی، حسیں بھی

اسے دیکھو اگر دیکھا نہیں ہے

اسے چاہا کرو تنہائیوں میں

وہ سب کا ہے فقط میرا نہیں ہے

اسے معلوم ہے ساری حقیقت

اگرچہ منہ سے کچھ کہتا نہیں ہے

وہی زندوں میں ہے اب ایک زندہ

وہ مر کر بھی کبھی مرتا نہیں ہے

اسے اتنی حقارت سے نہ دیکھو

اکیلا ہے، مگر تنہا نہیں ہے

اسی کے نام کا سکّہ چلے گا

اِسے تم نے کبھی سوچا نہیں ہے

بتا دوں گا مَیں سارا حال اس کو

کوئی اس کے سوا چارہ نہیں ہے

یونہی اک فاصلہ سا ہو گیا ہے

وگرنہ تم سے کچھ پردہ نہیں ہے

جواب اس خط کا بھی آیا ہے اِمشب

جسے ہم نے ابھی لکھا نہیں ہے

تماشائی بھی اب تو کہہ رہے ہیں

یہ سودا اس قدر سستا نہیں ہے

چھپا سکتا نہیں خوشبو کو، مضطر!ؔ

یہ تھانے دار نے سوچا نہیں ہے

چوہدری محمد علی مضطرؔعارفی

http://urdu.goldenpoems.com/